منتديات الموجة
  

     
   
 

منتديات الموجة القبطية
 المقالات المنشورة تعبر عن أراء أصحابها وليس بالضرورة رأى الموجة القبطية

؟؟ والمزنوق يا باشا ...

شكرا ايها المحافظ كنا نظن ان قلبك من حجر فوجدناه انعم من مناديل الكيلنكس .. ظلمناك يا طيب يا حنين .. كنا فى عز ثورة غضبنا عميانا لا نبصر واتاريك انت شايف وعلينا خايف .. معلش احنا مش عارفين مصلحتنا ..وانت رغم النضارة السودا لكن قلبك ابيض من قلب الكابوتشا ..ولابد من يوم معلوم تترد فيه المظالم ابيض على كل مظلوم .. بمبى على كل ظالم ..كنا فاكرينك ظالم ..وانت ياعينى من جوا بتتقطع علشانا .. ولما سألك الصحفى فى جريدة الوفد هى المنيا فيها فتنة . جنابك قلت حد الله بينى وبينها.. المنيا فيها تفتن .. الله عليك وعلى رهافة قلبك .. تفتن يا باشا ..ودى يعنى ايه ؟؟ اكيد كلمة قبيحة بس حضرتك مش عاوز تقول عشان ما تفتحش عيوننا ..اى حد بيسألنى دلوقت فيه فتنة فى مصر بقول لا والف لا مصر بها تفتن ..
د . ياسر يوسف غبريال
  3 أغسطس 2010
 جنابك هتاخد لقب المحافظ مخالف القانون بسبب النصارى .. سيادتك بعد ما اسقف مغاغة هد المطرانية القديمة ومبقاش فيه كنيسة جنابك سمحت رغم ان القانون لا يسمح .سمحت للنصارى يبنوا خيمة قماش زى الصوان بتاع الموتى يصلوا فيها من شهر مارس ولحد النهادرة ..ما نت عارف الشمس يا باشا بتلسع .. والرحمة فوق القانون رغم اننا منعرفش قانون يمنع الصلاة .. واحد غيرك كان قال يصلوا فى الخلا ونبنى لهم مستشفى جنب الخلا عشان اللى يجيلوا ضربة شمس يقولوله سلامتك .. مش بقول حنين ....ولما قالوله فى حوار مع الوفد برضه انت ليه بتعمل كدة مع اسقف مغاغة قال المحافظ اللى عارف الفولة انتوا ماتعرفوش المغانم اللى هيحصدها المطران ... ايه دا هى فيها مغانم ؟؟.. بقى كدة يا سيدنا عاوز المغانم لوحدك .. عشان كدة مصمصم على موقفك وعاوزنا نعتصم معاك .. تعال يا سيدنا نعد المغانم ..مغنم مغنم .. اولا هتبنى كنيسة كبيرة لاولادك .. ثانيا هتبنى مبنى خدمات محترم برضه لاولادك ..ثالثا هتبنى سور لحماية ولادك .. رابعا احنا ولادك ..وانت يا سيدنا راجل راهب يعنى متقشف لا ليك وريث ولا مطمع فى دنيا لانك بتعتبر نفسك عابر سبيل .. يعنى مش هتورث الكرسى .ومطلبتش شاليه فى مارينا ولا شرم .. شوفتوا بقى المغانم ...

بس الاقباط ليهم حق عرب عند جناب المحافظ لان سمعته لغاية كام يوم كانت فى الحضيض ..وكانت الدنيا قايمة عليه وعلى اللى بيعمله فى المنيا من ضرايب واتاوات وتبوير مئات الافدنة وتركيب اعمدة انارة مبالغ فى ثمنها جدا .. ولكن بعد ان خرج علينا مرتديا ثياب المدافع عن القانون فى مقابل الاقباط الخارجين عن القانون حتى اختلفت الصورة مية فى المية واصبحت يا سعادة المحافظ مدافعا عن الدولة وسيادتها رغم ان سيادة الدولة فى العدالة .. وفين العدل فى زمن الظلم ..ولو سألت اى واحد عن اى قانون يدافع محافظ المنيا مش هتلاقى حد عارف .. بس الاقباط هما الحيطة المايلة فى البلد دى .. مش عارف قانون ايه اللى يمنع بنا كنيسة عشان القديمة هتقع على روس اللى بيصلوا ولا قانون ايه اللى يشرد رئيس دينى ويهد بيته عشان شروط عقد اشبه بمن فتح بلد عنوة وفرض شروطه على اهلها المسالمين ..
سيدنا هد الكنيسة وفاضل بس السور والمبنى الادارى اللى نيافته قاعد فيه والحمامات..المحافظ يريد ان يتم تسوية كل ذلك بالارض وقال انا باعمل كده حتى يقتنع الرأى العام ان المحافظ قبل ما يبنى كنيسة بيهد واحدة تانية .. يعنى مش بيشجع بناء الكنايس لا سمح الله .. اسلوب جديد عاوز تبنى كنيسة هد واحدة مكانها اولا .. مفيش حاجة اسمها صلى فى القديمة ولما تبنى الجديدة هد القديمة .. الكلام ده فى البلاد اللى مفهاش حرية عقيدة .. لكن مصر مهد الحضارات مبدعة فى كل شىء .. طيب المطران يقعد فين.. بعد ما تهدوا بيته .. ياخد شقة قانون جديد .. ولا يروح فندق.. حتى مغاغة مفهياش اوتيلات .. طيب ومصالح المواطنين من زواج ومعمودية ووفيات ازاى تمشى ..ممكن جناب المحافظ يقولنا .. اكيد عنده الحل..

وفى ظل احساسنا بالظلم والذل ظهرت بارقة امل اخيرا رغم اصرار المحافظ على بنود غريبة وكأنها معاهدة مع اعداء وليس مواطنين كما قلت .. فى وسط كل هذا ومع فشل الوساطات الحزبية والامنيه .. وجدنا دكتور غاندى قسطور العضو القيادى بالحزب الوطنى يقول انه ممكن يبنى مبنى المطرانية الجديدة على حسابه .. متشكرين يا دكتور لكن المهم فى الخبر وده اللى بيكشف المعدن الحقيقى لمحافظ المنيا قال الدكنور قسطور ان المحافظ ممكن يسمح ببقاء دورات المياه فى المبنى القديم حتى بناء الجديد ...يااااااه مش باقولكم محدش عارف اللى جوا قلب المحافظ .. حق دخول الحمام اصبح مكفولا للاقباط فى مطرانية مغاغة ..بس يا ترى الحوار دار ازاى فى اجتماع القيادات مع المحافظ اتخيل ان هذا ماحدث : واحد : بس سيادتك السور للحماية
المحافظ : لا يتهد وابعتلهم مخبر يحميهم .. زائد ربنا هو الحامى .. واللى بيموت قتيل يبقى شهيد .. قصدى طبعا لو رجل شرطة اتقتل ..
مسئول : دول بيصلوا فى الشارع
المحافظ :عملت ليهم خيمة
طيب والمطران يقعد فين ؟
يقعد فى المكان اللى يريحه ليه مطلق الحرية لو عاوز يقعد عندى اهلا وسهلا ..
طيب وبناء الكنيسة الجديدة ؟؟
لما الريس يقول اوكى
بس انت وعدت ؟
كنت غلطان ولن اخالف القانون مش شفتوا المطران بنى سور حوالين الارض الجديدة وحط على الباب صليب من غير تصريح ( كرر المحافظ هذا الكلام على قناة الحياة )
جنابك طيب ولو حد حب يدخل الحمام ؟
يروح بيتهم او يكون عامل حسابه قبل مايروح الخيمة يصلى ..
والمزنوق يا باشا ؟؟
ممكن نعمل دروة قماش وحفرة ورا السور المهدود واللى عاوز يصرف نفسه
معلش جنابك الشعب هيدعيلك لما يرتاح .. الزنقة وحشة
طيب مفيش قهوة قريبة يصرفوا نفسهم فيها والدخول للحمام يكون بربع جنيه ولا حاجة
معلش ياباشا لو سمحت بالحمامات الشعب هيفرح وتبان انك راجل فير وعادل ومش متعصب
وهنا تدخل عيد لبيب وقال بعد ان تنحنح
الحقيقة انا مع المحافظ قلبا وقالبا مفروض المطران يشكر سعادته على سعة صدره ولو عاوز المبنى القديم او الحمامات ممكن يطلب كدة من جناب المحافظ بود ورجاء عشان يترك له سكنه والحمامات ( طبق الاصل جريدة الدستور يوم الاحد 1اغسطس تصريحات لعيد لبيب )
تنحنح المحافظ هو الاخر وقال وهو مستاء :خلاص موافق .. هاخالف القانون تانى .. وهاسمح للمطران واللى بيصلوا فى الخيمة بدخول الحمام ...بس برجلهم اليمين ..
مش باقولكم حنين ...

د . ياسر يوسف غبريال
 

Visitor Comments

 

 

 

 

 

 

   All rights reserved Coptic Wave Web www.copticwave.org
Copyrights@ Coptic Wave 2005-2016 Coptic Orthodox Church Egypt