منتديات الموجة
  

     
   
 

منتديات الموجة القبطية
 المقالات المنشورة تعبر عن أراء أصحابها وليس بالضرورة رأى الموجة القبطية

ايتها الرذيلة كم من الجرائم ترتكب باسمك !!

+ بعد قرار المحكمة الاخير بامكانية الزواج الثانى للاقباط   
تقابل واحد قبطى مع واحد تانى قبطى برضه

سأل الاول التانى :  هتكلل امتى
الحد اللى جاى
هو انت هتكلل قبطى ولا كاتوليكى
 ولا دى ولا دى
ايه بروستانتى
قاله : لا .. هاكلل على مذهب الامام ابوحنيفة !!!

 + يحلف المسلم ويقول على الطلاق بالتلاتة ويحلف القبطى ويقول على الطلاق .. بالمحكمة ..

  
د . ياسر يوسف غبريال
  4 يونيو 2010

 + طيب لو واحد مسيحى حب واحدة مسلمة وحب يكون اسرة ويتجوزها على اعتبار ان تكوين اسرة هو حق دستورى فوق اى اعتباررررررر .. فهل يا سيدى القاضى هتسمح ان النصرانى يتجوز المسلمة عشان الحق الدستورى فى تكوين اسرة ..التى هى اللبنة الاولى فى المجتمع ..واللى بتمنع من الرذيلة..             

+ قالت المحكمة ان امتناع الكنيسة عن التزويج التانى قد يدفع الى طريق الرذيلة !! الحقيقة يا جناب القاضى فيه ناس بتحب الرذيلة قوى ومش بيفرق معاها جواز من غيره .. ربنا خلق ناس كدة .. وغالبا اللى مش واخد التصريح ده بيكون اندفع لوحده للرذيلة والرذيلة ماسكة فيه ومش سايباه .. والبنات والرجالة اللى عددهم فى مصر فوق العشرة مليون وعداهم قطر الجواز والارامل والمطلقات .. اخبار الرذيلة معاهم ايه .. طيب لو انتوا عارفين طريق الرذيلة ما تقفلوه وتعملوا نفق ولا كوبرى بداله ..بس يعنى ايه رذيلة .. وليه الرذيلة عندنا فى مصر حاجة واحدة بس.. يعنى مص دم الغلابة رذيلة ولا فضيلة .. الموت بالحياة تعريفه ايه .. الرشوة اللى اسمها هدية .. النصب اللى اسمه فهلوة .. الظلم اللى اسمه حاجة العمل .. اللى ماتوا فى البحر والنهر واتحرقوا واسمه قضاء وقدر .. ازدراء المسيحية اللى اسمه ابداع .. منع بناء الكنايس اللى اسمه الحفاظ على الامن ..  الرذيلة اللى مغطية راسها ومتنكرة وعاملة نفسها فضيلة .. فعلا ايتها الرذيلة كم من الجرائم ترتكب باسمك ..                                                                                          

+ وليه حمادة رائد الشباب السيس فى معهد نوكيا يتم رفض طلباته المتكررة للاعتراف بالزواج العرفى الذى هو مفروض شرعى .. هو مش من حق حمادة وسوسو وتوتو ولولو تكوين اسرة حتى بالعرفى .. على اعتبار ان تكوين الاسرة حق دستورى فوق اى اعتبار ..يعنى ينحرف حمادة ولا يكون اسرة بالقانون ومش مهم اى اعتبار اخر .. ربنا مايرضاش بالظلم !                                                                             

+ امانة عليك ياحضرة القاضى بما ان تكوين اسرة هو حق دستورى وانسانى فياريت تبلغ زميلك القاضى اللى فى نجع حمادى انه كان فيه شباب زى الورد كان نفسه ينال الحق الدستورى .. وكان نفسه يكبر ويكون اسرة وكانت اهاليهم مستنية اليوم ده .. بس تم قتلهم يوم العيد من خمس شهور واكتر .. بلغ زميلك عن الحق الدستورى يمكن يحكم بالعدل ويمكن يراعى الدم ..!! ولا بلاش احسن يقولك طب ما الكمونى من حقه الدستورى يكون اسرة برضه ويطلعه براءة !!                                                                   

+ يقال ان زوجة واحد مصلح قبطى ومفكر فضائى تعانى من هلاوس من ساعة ما طلع الحكم بتاع الجواز التانى ... عندما ذهبت للطبيب النفسى عرفت السبب على طول .. خايفة جوزها يطلقها و يتجوز مدنى عشان يثبت عمليا ان الجواز المدنى حلو وزى فتح علبة زبادى  !!                                             

 + قالت المذيعة هناء السمرى على قناة المحور ان الكتاب المقدس مخالف لحكم القضاء ..معلش يا جماعة مشكلة الامية فى مصر مالهاش اى حل ..!!                                                          

+ طيب لو واحد قبطى رفع قضية عشان مراته تخينة ودمها تقيل وعاوز يتجوز عليها ..و عشان متريشة وغنية مش هيطلقها ..عاوز بس يغير وزن الست .. ورفع قضية عشان المحكمة تسمحله يتجوز تانى على مراته .. وقال يا سيدى القاضى عاوز اتجوز واحدة تانية والا ساسلك طريق الرذيلة فهل سيحكم له القاضى بالزواج لمنع الزوج من المشى البطال ؟؟                                                                          

+يقال ان الكمونى من محبسه فى نجع حمادى ابدى ضيقه من الحكم بالسماح للاقباط بالزواج التانى وقال لجريدة اليوم السابع يعنى يسمحوا للنصارى يتجوزوا تانى وما يسمحوش لنا نقتلهم ..                         

+اكثر الناس سعادة بالحكم كان القسيس البروستانتى (ر.ف) حيث ان شعب كنيسته كله فى شبرا  كان بيروح يتجوز ارثوذكسى عند الارثوذكس  .. كدة هو هيحاول يقنعهم بالمدنى مادام معرفش يجوزهم على طقس مارتن لوثر ..  معلش مش عاوز حد يزعل القافية حكمت زى كدة ما المحكمة حكمت  !!          

+ اللى بيحصل ده بيفكرنى بواحدة ممرضة كانت لما تلاقينى باسمع فيروز على اللاب توب بتاعى كانت تقوللى يعنى يا دكتور مفيش قرأن على البتاع ده  (طبعا عارفة انى نصرانى ).. كنت باقولها باسمعه الصبح وانا راجع من الكنيسة ..!! الناس مش قادرة تفهم ان الدنيا فيها المسلم وفيها المسيحى وفيها اللى بيعبد البقر ..!!  وكل واحد حر فى حياته تبعا لايمانه وقناعاته  !!                                                           

 د . ياسر يوسف غبريال

   

Visitor Comments

 

 

 

 

 

 

   All rights reserved Coptic Wave Web www.copticwave.org
Copyrights@ Coptic Wave 2005-2016 Coptic Orthodox Church Egypt