منتديات الموجة
  

     
   
 

منتديات الموجة القبطية
 المقالات المنشورة تعبر عن أراء أصحابها وليس بالضرورة رأى الموجة القبطية

إيجابيات عصر (مبارك)

أصدر نيافة الأنبا دميان أسقف ألمانيا بالتعاون مع عشرات المنظمات القبطية بأوروبا وأمريكا
ومصر، بياناً وجهه للسيد الرئيس حسنى مبارك هنئوه فيه على صحته ( ألف حمدلله ع السلامه جنابك) وميلاد حفيدته الجديدة ( فريده) وتم تقديم مشألله دهب لجناب جلالتها وشوية فول وحمص وبنبونى من ألمانيا وغربال وهون دهب لزوم السبوع ( وحلاقاتيك برجالاتيك) ، كما طالبوا عدة مطالب، أبرزها نقل الملف القبطى من أمن الدولة إلى رئاسة الجمهورية يعنى الحركه فيها بركه وآهو تغيير يعنى مش هيضر وعلى رأى المثل ( ماسخم من سيدى إلا ستى).
كما طالب البيان بضرورة إصدار قانون دور العبادة الموحد قبل مطلع الألفية الرابعة وعليكم خير، ومحاكمة المتهمين فى قضية نجع حمادى بشكل عاجل علشان بس نسد بوء اى حد يتلامض من بره ولا من جوه ( جنابك) ، وكذلك مراعاة التشريعات التى تضمن تمثيل الأقباط سياسياً بشكل عاجل ( زى القبطى اللى شرفه زمانه بفرش سرير جنابك ياريس كده يعنى) ،

الفنان شفيق بطرس
  5  أبريل2010
وهذا نص البيان:
بسم الله القوى، فخامة السيد الرئيس محمد حسنى مبارك رئيس الجمهورية.. بعد التحية
نحن المصريين المجتمعين معاً فى مدينة بون فى الاجتماع السنوى للمنظمة الدولية لحقوق الإنسان من أجل رفعة وسلامة مصر الغالية نسعد ونتشرف بأن نقدم خالص التهانى لسيادتكم بتمام الشفاء و عودتكم لأرض الوطن الحبيب وميلاد حفيدتكم الغالية "فريدة" أطال الله عمركم وعمر حفيدتكم سنينا عديدة، ونحن لنا مطلب من سيادتكم وهو التدخل الشخصى لإصدار القانون الموحد لدور العبادة، ووضع الحلول الملائمة لتميثل الأقباط سياسيا و تحقيق إجراءات المحاكمة العادلة والسريعة لمجرمى نجع حمادى وتحويل الملف القبطى إلى ملف سياسى يخضع لرعاية سيادتكم بدلاً من أمن الدولة، كما نرجو أن تشملوا بناتكم القصر بتوفير الحماية الملائمة لعدم التحول من دين إلى آخر إلا بعد بلغوهن سن الرشد كما نطلب من سيادتكم التدخل شخصياً للإفراج عن شباب مدينة نجع حمادى، أبنائك المصريين فى الخارج.
وأضاف الأنبا «دميان» أن كلمه الافتتاح التي سيلقيها ستكون ‏بمثابة إعلان عن الايجابيات التي يعيشها الأقباط في عصر ‏الرئيس«مبارك» وسيذكر فيها موافقة الرئيس على أقامه كنيسة ‏في مدينه 15 مايو هذا فضلا على استجابة الحكومة المصرية ‏لعديد من مطالب الأقباط.‏

وقال "أما مؤتمر بون الذي يبدأ اليوم فهناك عديد من أقباط ‏المهجر ومحامين من داخل وخارج مصر وهناك من يرتزقون ‏من وراء إظهار صورة الأقباط داخل مصر بشكل مؤسف ومن ‏هذا المنطلق كان حرصنا على التواجد لإظهار الايجابيات وليس ‏السلبيات فقط.
والى هنا نقف لحظات نتأمل ما قاله سيدنا نيافة الأنبا وما صرح به للصحافة ورجال الإعلام‏ وكل ما فهمناه ان نيافته يلتمس الأعذار ويحاول إيجاد المبررات للتواجد فى هذا المؤتمر وكأن تواجد نيافته رجس من عمل الشيطان أو هرطقة وكفر، ويقول وحيث أننى مواطن ألمانى وهذه المنظمة الحقوقية منظمة ألمانية حقوقية ولها فرع فى مصر فمعنى ذلك ان النظام المصرى يسمح لهم بالعمل على اراضي دولته المصرية فلا مانع ان آتى وأحضر المؤتمر ، ليس لأن الأقباط مهضومة حقوقهم لا سمح الله .لا لا لا لا لا لا ..أوعى حد يفهمنى غلط يا جماعه !!! انا أحضر المؤتمر فقط لكى أجهض عمل أى شخص تسمح له نفسه وأن يرتكب جرماً فى حق حكومتنا اللطيفه الظريفه اللى مدلعانا ومهشتكانا وعطيانا كووووووووووووووووووووووووول حقوقنا على عينك يا تاجر ، أى واحد أو أى مجموعه من المتاجرين بالقضية القبطية ويحاول يكذب ويلفق التهم للنظام المبارك العادل الفاضل الجميل ويكذب ويلفق ويقول لاسمح الله لا سمح الله ان فيه اى أضطهاد فى مصر أنا بقى جاى أللبه وأجهض أكاذيبه وأعّرف المسئولين عن منظمة حقوق الإنسان الدولية اننا فى مصر عال العال وجاى مخصوص أظهر وأوضح الإيجابيات القبطية فى عصر مبارك المبارك ، داحنا ياجماعه متمتعين بالرفاهية واللى عنده تلات ولا أربع عيال بيدبحوا منهم والآخر ينضرب بالنار وكده ويقل عدد الأسر المسيحية وبكده بيرتفع مستوى المعيشه للأسره واللى يصرف على سته مش زى اللى يصرف على اتنين..شفتم بقى عاملين على مصلحتنا ازاى آدى الأيجابيات ياناس ؟

كمان اللى عنده بنت على وش جواز بياخدوها حبايبنا المسلمين بهدومها أيوه صدقونى بهدومها ياجماعه ولا بيكلفوا أهلها مليم واحد وترجع البنت شايله فى بطنها وجاره وراها عيال ماشألله شفتم بقى المحبه عايزين ايه إيجابيات أحسن من كده؟ ، دا حتى فى الأعياد بيضربوا النار ابتهاجاً بأعيادنا قدام كنايسنا والشيطان الملعون هوه اللى بينفخ فى الرصاص ويطير ويجى فى صدور شبابنا القبطى ، معلش وماله فدى أخواتهم وحبايبهم المسلمين ويعيشوا ويفرقعوا بمب ويطربخوا كام رشاش وأحنا بنرّحل عيالنا للسماء مع الشهداء على قفا الغلابه المسلمين الأحباء ، وبعدين كنيسة مدينة 15 مايو دى شفتم الأيجابيات فى قصتها المدينه منشئة منذ 1975 يعنى فوق الأربعين سنه من غير كنايس وسكانها المسيحيين لما يسافروا خمس أو ست ساعات لأقرب كنيسه لهم مش ده ذياده فى الأجر والصواب برضك والراجل ماسكتش وبحركة محبه وشهامه من فخامته أصدر قرار جمهورى بالتصريح ببناء كنيسه وعلى ما يتنفذ القرار ويخرج من الأدراج قدامه اربعين سنه تانى وماله طولة العمر قدامنا ياجماعه وبرضه اربعين سنه ..أو مائة وأربعين سنه لا تساوى شىء من عمر الشعوب، ايه ياجماعه بقى اكتر من كده ايجابيات للأقباط ولسه الناس اللى نياتهم (سو) وبيفتكروا ان احنا جايين للمؤتمر نتكلم عن اضطهاد ودياولوا ،وآدى الجَمل وآدى الجَمّاّل وآدى المؤتمر وآدى البيان وكل سنه وانتم طيبين وحلوين ومتهنيين بالعيد وشم النسيم وتاكلوا فسيخ ورنجه وبيض ملون أشكال وألوان بلا هم ياراجل بلا حقوق إنسان .

الفنان شفيق بطرس



 

Visitor Comments

 

 

 

 

 

 

   All rights reserved Coptic Wave Web www.copticwave.org
Copyrights@ Coptic Wave 2005-2016 Coptic Orthodox Church Egypt