منتديات الموجة
  

     
   
 

منتديات الموجة القبطية
 المقالات المنشورة تعبر عن أراء أصحابها وليس بالضرورة رأى الموجة القبطية

يا مصــــــــر شمى النسيـــــم براحتـــــــك ..!!

رحم الله اياما كان فى مصر نسيم وكانت مصر بتشم .. النسيم طبعا .. الان لم يعد هناك نسيم وتم تحريم حاسة الشم ..فبعد موجة تحريم عيد الحب وعيد الام وتحريم كلمة عيد اساسا .. يتم الان تحريم عيد شم النسيم وهى موجة بدأت من سنين وتطالب المواطنين بعدم الاحتفال بعيد شم النسيم وغيره من اعياد الكفار.. وتطالب بسد الانوف وقفل الشبابيك والبعد عن البحر والنهر والترع والمصارف ..واخر فتوى فى هذا المجال هى تحريم بيع البيض والرنجة فى شم النسيم وعلى البائع ان يسأل المشترى انت واخد البيض دا ليه عشان تاكله ولا ترقد عليه .. ولا تلونه .. ولا تعمل بيه كيكة .. ولا الفرخة اللى فى البيت عاوزة بيض ..اما الرنجة فهى حلال بغيض والفسيخ غير مستحب لانه سمك ميت والاكل فى الميت حرام .. اما البصل الاخضر فبيعمل ريحة فى البق .. وربما شربت بيبسى بعده .. يا مصر شمى النسيم براحتك ..
د . ياسر يوسف غبريال
  2  أبريل2010
رحم الله اياما كان المصريون اقباط ومسلمون يكحلون اولادهم فى ليلة سبت النور دون النظر انها الليلة التى تسبق القيامة .. وقبل السبت هناك اربعاء البصخة المعروف شعبيا باربعاء ايوب والذى يشهد احتفالا شعبيا خاصة فى العريش وينزلون البحر ويدلكون اجسامهم بنبات رعرع ايوب ..دون ان يقول احد انه يوم من اسبوع الام السيد المسيح .. ولاننسى يوم الغطاس الذى كان يسمى فى الصعيد عيد البلابيصا وكان الكل يغطس فى النيل رغم برودة الجو وماحدش قال دا عيد المعمودية واللى هينزل الميه هيبقى نصرانى ..دعوا الناس يفرحوا فلم تصدر عن الكنيسة مثلا فتوى تحريم اكل القطايف او شراء حلوى المولد او الفرجة على فوازير رمضان .. تعودنا على المدفع فى رمضان ونصوم مع المسلمين فى عملنا ونزاحم على شراء قمر الدين والمكسرات وشنطة رمضان ..انا فاكر مرة خادمة معانا مالقيتش غير القطايف تعملها للولاد فى خدمة قرية ماكانش باقى غير نوزع فوانيس .. بعض الزملاء يسألوننا اسئلة غريبة لم تكن تسئل من قبل .. مثلا ايه ده يا دكتور انتوا بتاكلوا حلاوة المولد زينا .. اه زيكوا طبعا اكيد بنفتح بقنا ونحط الحلاوة ونقطمها وكدة ..ولى صديقة مسلمة مازالت تشترى بابا نويل للعيال رغم ان ابن اختها المتدين حديثا بيقولها دا حرام حرام خاصة ان حنان ترك قالت ان بابا نويل حرام والشيخ الجندى قال بابا محمد اولى من بابا نويل .. يا مصر شمى النسيم براحتك
سقى الله اياما ليست من زمان قوى وبالتحديد عام 1917 عندما اصدر الشيخ حسن المملوك وهو موسيقى كبير من جيل الرواد وله مؤلفات والحان منها نشيد البرلمان المصرى هذا الرجل اصدر نوتة موسيقية اسمها تحية شم النسيم وهى مقطوعة زجليه من تأليفه وتلحينه قبل فتاوى التكفير والتحريم والسؤال الدائر هل نشارك النصارى احتفالهم بشم النسيم ام لا ..
يقول الشيخ حسن المملوك :
فى يومك نهيص ونفرح كتير ... ونضحك ونلعب صغير مع كبير
مسيحى ويهودى مع المسلمين ... فى بحر المحبة وروض النعيم
اياااام ..كانت مصر زى بوكية الورد .. الشامى جنب المغربى .. الجريجى جنب التركى ..اليهودى جنب المسيحى والمسلم ودلوقت صفصفت علينا ويا ريت مستحملين بعض .. تخيلوا بوكية ورد لونه ابيض بس او احمر بس .. يفتقد التنوع .. وربنا خلقنا الوان ومختلفين ..هو بحر المحبة نشف ولا ايه ..
ويقول الشيخ حسن فى بداية الاغنية :
تطيب الخواطر وتصفى القلوب ... ونسمع اغانى تزول الكروب
يغنى حبيبى على السامعين ... سلامى عليك يا شم النسيم
بس الاغانى دلوقت يا عم حسن حرام .. وكلمة حبيبى حرام ..والسلام لا يجوز على شم النسيم وغيره .. و جبر الخواطر على الله .. الله يرحمك يا حسن يا مملوك يا راجل يا رايق ويرحم ايامك اللى كانت فيها مصر منورة باهلها ومزهزه وملونة وفرحانة .. لم يكن بها بعبع التحريم والتجريم وسلامى يا مملوك عليك مع شم النسيم .. يا مصر شمى النسيم براحتك ..
ويخرج واحد يقولك انت كدة بتتشبه بالنصارى فى هذا العيد والمرء يحشر مع من يحب .. طب يا اخى ما احنا فى الدنيا محشورين مع بعض .. فى المترو والاتوبيس وطوابير العيش والانابيب والسولار والسجل المدنى والجيش ودكك المدارس وسراير المستشفيات ..وشقق الايواء ..وخط القنال ..وقطار الصعيد وعبارة السلام .. الدين لله والحشر للجميع ..
فى عام 1947 اصدر محمد كامل شاكر كتاب اسمه شم النسيم والاعياد فى مصر وبحث فى اصل العيد وفصله وانقل لكم عنه جملة هامة جدا : ( وامر اشتراك المسلمين والاقباط فى بعض الاعياد يجب الا يكون موضع غرابة اذا عرفنا ان المسلمين والاقباط احفاد قدماء المصريين وكلاهما ينتمى الى اصل واحد كما تستظلهم سماء واحدة يعيشون فوق ارضها ) .. سماء واحدة يا عالم وتاريخ واحد يا مصر ..ان عيد شم النسيم اقدم عيد مصرى وكان يسمى شمو وهو عيد الحصاد ثم تطور الى شم النسيم ..وكان المصرى القديم يهدى زوجته زهرة لوتس فى صباح هذا اليوم ..وكان المصريون منذ اقدم العصور يخرجون للنيل والجداول ويشمون الهواء النقى ويأكلون البيض الملون والملانة والسمك المملح والبصل الاخضر .. وسجلوا تلك الوقائع على المعابد فى صور جميلة .. واستمر العيد فى مصر المسيحية ولانه كان ياتى وسط الصوم الكبير فجعلوه اليوم التالى لعيد القيامة واستمر الاحتفال به فى مصر بعد دخول العرب مصر وكان مهرجانا شعبيا خاصة فى عهد الفاطميين ولم يكن شم النسيم وحده عيدا شعبيا بل كل اعياد الاقباط من نيروز وغطاس وحد الخوص وشيئا فشىء اختفت الاحتفالات وانحصرت داخل جدران الكانئس واتخذت طابعا قبطيا ولم يبق سوى شم النسيم بعد فشل المحاولات المتكررة لجعل النيروز عيدا قوميا فى ظل مجتمع ينكر تاريخه ويستورد رمال من الصحراء وها هى الرياح الصحراوية تهب على شط النيل تريد ان تردمه ..يا مصر شمى النسيم براحتك ..
مسكين هذا الشعب هيلاقيها من مين ولا مين ..الحكومة محرمة اللحمة وبعض الشيوخ بتحرم الفسيخ والبيض ..اما الفول فحلال حلال .. علينا وعلى البعير ..يا سادة اشربوا على روح مصر قهوة سادة .. لو كان عيد شم النسيم اللى هو حرام مناسبة فقط ليزور الناس بعضهم ويخرجوا يشموا الهوا يبقى حلال جدا ..نختلط ببعض مسلمين ومسيحيين .. ناكل ونلعب ونحتل شط النيل ونحتكر الخضرة ونخلص كل الهوا .. اللى هيتباع فى ازايز قريبا جدا ..ليكن يوم شم النسيم ثورة شعبية على القبح والفقر والجهل والتخلف والجفا .. يا مصر شمى النسيم براحتك ..

د . ياسر يوسف غبريال
 

Visitor Comments

 

 

 

 

 

 

   All rights reserved Coptic Wave Web www.copticwave.org
Copyrights@ Coptic Wave 2005-2016 Coptic Orthodox Church Egypt