منتديات الموجة
  

     
   
 

منتديات الموجة القبطية
 المقالات المنشورة تعبر عن أراء أصحابها وليس بالضرورة رأى الموجة القبطية

ليس شرفا يا جنابه ..!!

بعد هوجة تصريحات محافظ قنا عن طبيعية حادث نجع حمادى وان المذبحة رد فعل طبيعى للاغتصاب المزيف للبنت اللى ماتت معنويا فى فرشوط بدأت موجة جديدة غير موجة كوميدى وان كانت اكثر اضحاكا ولكنه ضحك كالبكا ..
الموجة الجديدة هى موجات التصريحات حول بناء الكنائس وبدأها فضيلة محافظ المنيا الراجل العسل ابو نضارة بنى واللى تصريحاته دايما بتاكلنى .. اما امارة المنيا فهى محافظة المليون جامع وزاوية ومئذنة وحصيرة وميكرفون دا غير الملصقات .. الراجل قال ان من حق النصارى يبنوا كنيسة ليصلوا لكن دون استفزاز لمشاعر المسلمين .. وكان هذا عندما تنازل اخيرا ووافق على بناء مطرانية لمغاغة بدل اللى هتقع على راس النصارى ومطرانهم هناك وذلك بعد ان فاض الكيل بالاقباط وعملوا كل حاجة حتى عجين الفلاحة عشان نظرة من المحافظ الهمام واخيرا قرر المحافظ ان تستولى الدولة على ارض المطرانية القديمة وتقوم الكنيسة بالبناء على الارض الجديدة اللى تملكها امام المطرانية القديمة على اساس انه عيب يكون للاقباط كنيسة شمال ويمين او كنيسة شمال وبيت للمطران يمين .. حيث ان فى ذلك استفزاز للمسلمين الغلابة المساكين اللى مستنين متر ارض ..

د . ياسر يوسف غبريال
  23  مارس2010
ولا اعرف ما المستفز فى بناء كنيسة فهى ليست كبارية او مرسح او سينما اووكر مخدرات او مصنع متفجرات او مكان للحض على الكراهية..واللى انا مش عارفه تحت اى بند سوف يتم الاستيلاء على ارض الكنيسة القديمة غالبا تحت بند بضاعة اتلفها الهوى .. الحقيقة المنيا تملك اطول مآذن فى مصر وبدأ هذا الموضوع من ايام حميدة المحافظ السابق اللى خلى المطارنة يتبرعوا بعشرات الالوف لبناء افخم الجوامع ..اللى بتتبنى فى الميادين العامة وعلى ارض الدولة وفى وسط الطريق .. تبقى القرية عشرين بيت من الطوب النىء والجامع ولا جوامع الاندلس .. ويجى محافظ المنيا دلوقت ويقولك استفزاز ويستولى على ارض الكنيسة للمنفعة العامة يعنى حسب كلامه مدرسة نادى مستشفى وماحدش عارف احتمال كبير جامع كبير على ارض المطرانية القديمة مش برضه الجامع مصلحة عامة ..

 بلد غريبة جدا .. وتصريحات المسئولين دى هى اللى بتدى الضوء الاخضر للجماهير العريضة للهجوم على الكنايس والاقباط وبيوتهم وممتلكاتهم وحرقها ..دا فيه بلاد وقرى فى الصعيد والدلتا تم تجديد مساجدها بمبالغ خيالية غير مبررة ولا مفسرة ولا معروفة المصدر ناس تقول من الكويت وناس تقول من السعودية وناس تقول اخوانجية وناس تقول حكومية مثل مساجد قنا كلها .. وقرى بالكامل نسوانها اتنقبت وبياخدوا شهرية من الجوامع .. بقى دا اللى يخوف ولا كنيسة مسالمة تصلى للرب وتنادى بالحب ..!!

اما فضيلة محافظ القليوبية المشتشار عدلى حسين والذى بيتكلم فى موضوع القانون الموحد لدور العبادة كثيرا جداااا وقال لا فض فوه و لا اسكت الله له حسا ان قانون دور العبادة الموحد الذى هو حلم لن يتحقق فى القريب العاجل قال انه سيؤدى الى فتنة طائفية لان المسيحيين والمسلمين لن يقبلوا ان تسمى الكنائس والجوامع باسم دور عبادة ..يا قلبى .. الحقيقة يا جنابه الكلام مش ماشى عدل ويحتاج ان الواحد يقف على راسه عشان يفهمه .. يعنى المشكلة ان اسم القانون دور العبادة .. بلاش يا عم خليه القانون الموحد لبناء الجوامع والمساجد والزوايا والمصليات وكدة .. وتحت كلمة كدة نحط الكنايس وغيرها .. ولا اقولك الجوامع مش محتاجة قانون خلى القانون للكنائس بس وسميه قانون دور العبادة للى ما يتسموا .. لو ده الحل اللى محير الوزير البيه المحافظ احنا راضين بيه .. وكان جنابه فى تصريحات سابقة قد قال انه لو تركت حكاية بناء الكنائس فى ايدى المحافظين فلن تبنى كنيسة واحدة وماحدش سأله ليه ..ويرجع جنابه يناقض نفسه ويقول اللى اتبنى فى عهد مبارك اكتر من اللى اتبنى من ايام محمد على .. الاقباط ايام المرحوم محمد على كانوا 800 الف نسمة دلوقت بتاع 10 مليون !! ..
واخيرا فجر القنبلة التى فرقعت فى وشنا كلنا عندما قال شرف للكنيسة ان تبنى بامر رئاسى .. واقوله لماذا لاتنال الجوامع هذا الشرف بل انها حتى لا تنول شرف المحافظ ولا حتى مدير الحى .. هى سجادة او حصيرة وميكروفون ويافطة هنا مسجد وخلاص.. ولماذا لا ينتظر جناب المحافظ مثلا ان ينول شرفا رئاسيا بتصليح دورة مياه فى منزله لو تعطل السيفون مثلما يحدث فى الكنائس ..

ومؤخرا انقلبت الدنيا عندما ركب الاقباط شوية بلاط فى بورسعيد .. وايضا تم حرق سيارات ومنازل الاقباط فى مطروح فى وقائع مرعبة بخسائر تفوق المليون جنيه عشان سور حوالين ارض ملك الكنيسة اساسا .. وتعال هنا اقولك كيف ينال بيت الله الذى يبنى لعبادته شرفا من اى مخلوق ارضى حتى لو كان الرئيس حسين اوباما .. عارا عليك يا جنابه .. ما منظرنا قدام العالم لما يقروا تصريحاتك دى والتى نشرت كعنوان فى موقع اليوم السابع الالكترونى ثم اسرعت الجريدة وغيرت هذا العنوان لما يحمل من جرسة وفضيحة ولا اعلم كيف استقبل العالم خبر ان الرئيس قد عاد لمزاوله اعماله ومن ضمن قراراته قرار ببناء كنيسة فى 15 مايو .. فى الاول استغربت وقولت ازاى كنيسة تتبنى فى يوم واحد.. وبعدها عرفت ان القصد مدينة 15 مايو اللى مبنية من كام سنة وسكانها فوق ال200 الف .. طبعا نحن نشكر الرئيس ونطالبه اتم الله شفائه ببناء كنيسة فى واحد مايو واتنين مايو وتلاته مايو واربعة مايو ..الخ .. لانه هنال مئات الالاف من الاقباط لا يجدون كنيسة يصلون فيها ولا يعرفون اين يصلوا على موتاهم ممكن يعدوا البحر او يمشوا بالساعات ..وهناك قرار غريب جدا وهو عدم اعطاء تصاريح بناء كنايس بالمدن الجديدة الا بطلوع الروح ويتم تصريح للكنيسة الارثوذكسية فقط وليس لباقى الطوائف ..وخسرت الكنيسة الانجيلية قضية من هذا النوع .. وطبعا هذا الكلام اهديه لاكرام لمعى ورفعت فكرى حبايب الحكومة ..

لابد من حل عاجل لمشاكل بناء الكنائس فى مصر لان بعض المفكرين والصحفيين فى مصر يروجون لنظرية ان بناء الكنيسة يأتى لصبغ مصر بصبغة نصرانية مثلما قال المتفكر محمد عمارة انه لو الاقباط فى جاحة لكنيسة لشال القصعة بنفسه ولكنه يرى ان النصارى يريدونها فاتيكان .. محمد عمارة مفكر القصعة يرى ان الكنائس فى مصر مظهر للتفاخر المسيحى اما سليم العوا فيرى ان منظر الصلبان فوق القبب يصيبه بغممان نفس .. اما كثير من الصحفيين فيعتنقوا نفس افكار ابن لادن ويروجوا لها فاذا كان هذا حال مفكرى مصر فماذا عن جهلتها .. اننا فى حاجة ليس لقانون لدور العبادة ولكن فى كتاباتهم ويحرضوا الشعب على بعضه .. فيه واحد صحفى اسمه عبد الوهاب عدس كتب موضوع تقلية خالص فى الجمهورية عن ان الاقباط يريدون كنيسة فى كل شارع .. لا يا ابوجبة احنا الحمد الله عندنا كنيسة فى كل بيت لكننا نريد بيتا للعبادة الجماعية فى كل مدينة او حى ودا حقنا مش فضل من حد ..اننا لسنا فى حاجة لقانون لدور العبادة بل قانون للابادة ..ابادة الافكار البدوية المتخلفة .. وزرع المساواة والمواطنة وقبول الاخر والتعايش مع الاختلاف بسلام ومحبة ..

لقد اصبح يوم الجمعة يمثل رعبا اسبوعيا متكررا لدينا وكأنه فيلم رعب متعدد الاجزاء نفس السيناريو وان اختلف الممثلين ولكن غالبا نفس المؤلف والمخرج ..تخيلوا معى قرية تحيا فى سلام ووئام ثم تثار اشاعات ان الاقباط اجتمعوا فى بيت احدهم للصلاة فيخرج امام مسجد ينادى بالجهاد لدحر النصارى وهدم معبدهم فوق رؤوسهم ولا يتوقف الامر عند الكنيسة المزمعة ان تكون ولكن يمتد الى الاشخاص والبيوت والمحال والسيارات .. وتيجى الحكومة بعد خراب مالطا وتخرج ابواق الاعلام وتقول الحق ع النصارى حيث ان المبنى مش مرخص ..ترخيص من اجل الصلاة ولا الشعب فى خدمة الشرطة فنجد الشعب عن بكرة ابيه بيهجم ع الكنيسة ويوفر على الشرطة التعب ..ثم يتم القبض على اقباط وعدد من المسلمين القصر حتى لا يسئلوا وبعدها يرغم الاقباط على الصلح ويطلق سراح الاولاد ويتم دفع تعويضات او لا ويغلق المكان او الكنيسة للابد والصلح خير خليك صالح وانسى اللى كان بينا امبارح ..لحد الجمعة الجاية.. وسلملى على مفيد شهاب اللى قال ان قانون الهمايونى تطور مهم فى بناء الكنائس وان القانون الموحد لدور العبادة هو التطور الطبيعى للخط الهمايونى زى ما فيروز هى التطور الطبيعى للحاجة الساقعة ..وقال ايضا انه ليس العصا السحرية لحل مشاكل الفتنة الطائفية طيب قلنا الحل يا ابو اوسة على جنب ..اما الدكتور مصطفى الفقى فده دنيا لوحده فقد قال ان القانون سيعيقه حكاية الاديرة التى تملك الاف الافدنة وعلى حد علمى ان السادة المسئولين دول خريجى جامعات ومعاهم شهادات عليا وحاجة فخمة ولكن تصريحاتهم لا تتفق مع كونهم متعلمين اساسا .. فهناك فرق كبير بين دار العبادة والاوقاف .. فالدير له مساحة محددة وكنائسه صغيرة ولكنه يملك اوقافا من الافدنة مثله مثل الاوقاف الاسلامية وهذه لا تدخل تحت بند دور العبادة ..

بعد ما كتبت الكلام ده نمت وفيما انا نعسان شفت حلم انما ايه كابوس .. شفت راجل مدلدل الشنب يمشى الى جوار زوجته المفترية وهى تقوده وتمشيه وراها وتعد عليه الخطوة والنفس والنظرة ولا تتفاهم معاه سوى بابو وردة ..والرجل واخد على كدة وبينما يسير وراءها فى الجونينة .. شمال يبقى شمال .. يمين يبقى يمين .. فجاءة يرى امامه طفلا صغيرا رقيقا يداعب الفراشات ويبنى بيتا من خشب الشجر ..فتنظر اليه الولية المفترية وتكح .. فجاءة الراجل يتحول الى عنتر ويهدم بيت الطفل ويضربه .. ويطلع كل عقده عليه ..ويزمجر مثل اسد الحديقة وارد افريقا وتنظر اليه الزوجة المفترية ولسان حالها يقول عاملى عنتر ثم ترسم على وشها الحنان الكاذب وتميل على الطفل وتقوله يا حبيبى ثم .. ثم ترزعه قلم وتقول لزوجها سبع طول عمرك وتنظر له شذرا فيطاطى راسه حذرا وينجر وراها ويهاجم فى طريقه الاطفال والاشجار والازهار وليس فى البال ان الطفل سوف يكبر يوما ما ..والسؤال اللى محيرنى من ساعة ما صحيت.. مين الرجل مدلدل الشنب .. ومين الزوجة المفترية ومين الطفل .. وايه البيت اللى من خشب الورد .. وايه هو ابو وردة ..؟؟
د . ياسر يوسف غبريال

 

Visitor Comments

 

 

 

 

 

 

   All rights reserved Coptic Wave Web www.copticwave.org
Copyrights@ Coptic Wave 2005-2016 Coptic Orthodox Church Egypt